9ێ نیسانا 2003، دەستپێکا قوناغەکا نوی ل عیراقێ و دوماهیا دکتاتۆریەتێ
وەلید محمد
9ێ نیسانا ساڵا 2003, ئەو ڕۆژە یاکو ڕژێما بەعس یا دڕندە ل عیراقێ شکەستی و ڕۆژا سەددامێ دکتاتۆر ئاڤا بوو.
ب هەڕفاندنا ڤێ ڕژێما دڕندە گەلێ کوردستانێ و گەلێن عێراقێ هەوایێ ئازادیێ هەلکێشا.
د وێ ڕۆژێ دا، هەڤوەلاتیان و هێزێن هەڤپەیمانان، پەیکەرێ دکتاتۆر سەددامی ل گۆرەپانا فیردەوسا ناڤەندا بەغدا ئینا خارێ و هەرفاند.
پشتی بورینا ٢١ ڕۆژان ل دەستپێکا شەڕی، بەغدا یا پایتەخت کەفت. ل دەمژمێر 5:30ێ سپێدەهیا 20ێ ئادارا 2003، هێزێن هەڤپەیمانان ب سەرکردایەتیا ویلایەتێن ئێکگرتیێن ئەمریکا ئێکەم هێرشا ئەسمانی دەستپێکر بۆ ژناڤبرنا ڕژێمێ.
ویلایەتێن ئێکگرتیێن ئەمریکا بۆ شەڕێ ژ نافبرنا ڕژێما بەعسا عێراقێ شیا هەڤپەیمانیێ دگەل 49 وەڵاتان دروست بکەت.
ئەڤ شەڕە لژێر ناڤێ ( پڕوسەیا ئازادیا عێراقێ ) بڕێڤە چوو، هەردوو وەلاتێن بەریتانیا و ئوسترالیا هاریکارێن سەرەکیێن ئەمریکا بوون.
زێدەتر ژ 90%ێ هێزێن سەربازی ل هێزێن ئەمریکی و بەریتانی پێکهاتبوون.
ژمارەیا گشتی یا سەربازێن هەفپەیمانان زێدەتر ل 300000 سەربازبوون، ل وێ ژمارێ 250000 ئەمریکی و 45000 بەریتانی بوون، دگەل ژمارەکا سەربازێن دیتر یێن وەلاتێن هەفپەیمانان.
دوو ڕۆژا بەری دەستپێکرنا شەری، جورج بووشێ سەروکێ وی دەمی یێ ویلایەتێن ئێکگرتیێن ئەمریکا د گوتارەکێ دا داخاز ژ سەددامێ دکتاتۆر کر دەست ژ دەستهەڵاتێ بەردەت و دگەل کوڕێن خۆ عیراقێ بجهـ بهێلن بەلێ ئەو رازی نەبوو.
ئەوا جهێ داخێ یە، ئەوە کو پشتی هەرفاندنا ڕژێما بەعس یا دڕندە، ئەو هیڤیا مەزنا کو گەلێن عیراقێ چاڤەرێ دکر بۆ ئازادیێ و ئارامیێ، ب تەمامی نەهاتە دی. ل ناڤەڕاست و باشوورێ وەلاتی، توندوتیژی و توڵڤەکرنا مەزهەبی دەستپێکر و هزاران وەلاتیێن بێ گونەهـ بوونە قوربانی هەتا نهاش کاریگەریێن وێ د بەردەوامن.
ددەمەکی دا، ڕژێما بەعس هەوڵدا کو گەلێ کوردستانێ ژناڤ ببەت و چەندین تاوانێن مەزن وەک کیمیا بارانکرنا هەلەبجە، کومەڵکوژیی و جینوساید، ئەنفال، بێسەروشینکرن و ڤەگوهاستن …. ل دژی گەلێ کوردستانێ ئەنجامدا.
بەلێ گەلێ کوردستانێ ب سەر بلندی ماڤە و ئەنجامدەرێن ڤان تاوانا شەرمزارو ڕیسوا بوون.
ئەوا جهێ شانازیێ یە، گەلێ کوردستانێ هەردەم لێبوردە و ئاشتی خوازە و نەبتنێ تۆلڤەکرن نەکر، بەلکی کوردستان بۆ جهێ ڤەحەویانا ئاوارەیێن ناڤەراست و باشوورێ عێراقێ.
9ێ نیسانێ ڕۆژەکا مێژوویی یا گرنگە، کو بۆ هەردەم دێ ل یادەوەریا گەلێ کوردستانێ و گەلێن عیراقێ مینیت.
