خولا دوویێ، دەرفەتەکا زێڕین بۆ سەرکەفتنێ

وەلید محەمەد سلێمان
سەرپەرشتیارێ پەروەردەیی

پیرۆزباهییەکا گەرم ئاراستەی هەمی قوتابێین دەرچوو دکەم، بهەلکەفتا ڕاگەهاندنا ئەنجامێن پۆلا ١٢ێ، هیڤیا سەرکەفتنێ و بەختەکێ باشتر بۆ وان قوتابیێن خولا دوویێ بەشداری ئەزموونان دبن دخازم.

قوتابیێن هێژا،

خولا دوویێ تەنها درێژبوونا ساڵا خاندنێ نییە، بەلکی دەرفەتەکا زێڕین و گرنگە بۆ نیشاندانا شیانێن هنگۆ، بۆ بلندکرنا نمران و تەمامکرنا قۆناغا ئامادەیێ ب باشترین شێوە. زێدەباری ڤێ چەندێ، خولا دوویێ جوداهیەکا مەزن ل ئەنجامێن هەوەدا دێ دروست کەت، هەکە هەوڵ و پلان بباشی بهێنە دانان.

لەورا، داخازێ ل هنگۆ دکەم ڤێ دەرفەتا زێڕین ل دەست خۆ نەدەن. هەر ڕۆژەکێ ب هیڤیەکا نوو دەست ب خاندنێ بکەن، دەمێ خۆ ب باشی ڕێک بێخن، هەر چرکەیەکا خولا دوویێ ب باشترین شێوە مفای لێ ببینن.

دڵنیابن کو سەرکەفتن ب ماندیبوون، هەوڵدان و باوەری بخۆ هەبوونێ ب دەستڤە دهێت. هەر هەوڵەکا ڕاست، هەر لاپەڕەکێ بخوینن و هەر چرکەیەکا بۆ خاندنێ تەرخان بکەن، پێنگاڤەکە بەرەف ئاوات و داهاتوویەکی گەشتر.

قوتابیان هیڤیدارین مفای ل ڤان ئامۆژگاریێت گرنگ سەبارەت ئەزموونان وەربگرن:

۱- گەشبین بن کو دێ بسەرکەڤن، هەمی دەما هزر بکەن کو سەرکەفتنا هنگۆ یا مسوگەرە و چ جارا نەرێنی هزر نەکەن. سەرکەفتنا خۆ ل پێش چاڤێن خۆ دانێن و خۆ ل دوودلیێ و شەپرزەییێ بپارێزن و نەترسن.

۲- دەمێ خۆ ب شێوەیەکێ ڕێک و پێک رێك بێخەن و دویر بکەڤن ل سەرەدان، موبایل، تەلەفزیون و هەمی ئەو تشتێن کو سەرنجا مرۆڤی دگرن.

٣- جهەکی هەلبژێرن کو یێ گونجایی بیت بۆ خاندنێ، چونکی هەلبژارتنا جهی کاریگەرییەکا زۆر باش لسەر خاندنێ هەیە.

٤- ب شەڤێ زوو بنڤن و سپێدێ زی هشیار ببن، چونکی سپێدێ باشترین دەمە بۆ خاندنێ.

٥- ڕۆژێن ئەزموونێ ب جلێن فەرمی ل قوتابخانێ ئامادەبن.

٦-خوارنا تەندروست بخۆن، چونکی خوارنێ کاریگەریەکا زۆر باش یا هەی ل سەر هزر و بیرێن قوتابی. نابیت قوتابی بێ خوارن بچیتە د ئەزموونێدا.

٧- پرسیارێ زۆر بباشی بخوینن، چونکی تێگەهشتنا پرسیارێ نیڤا بەرسڤێ یە.

٨- د دەمێ بەرسڤدانێ دا لەزێ نەکەن و دەمێ خۆ بباشی بکاربینن.

٩- ل دەست پێکێ بەرسڤا وان پرسیارا بدەن یێن هنگ بەرسڤا وان ١٠٠٪ دزانن پاشی بەرسڤا پرسیارێن دیکە بدەنەڤە.

١٠- هەوڵ بدەن هەمی پرسیاران بەرسڤ بدەن و چ پرسیارا بێ بەرسڤ نەهێلن.

١١- زۆر بباشی پێداچوونێ د بەرسڤان دا بکەن بەری کو تێنڤیسا خۆ ڕادەستی مامۆستای بکەن.

١٢- خۆ ل هەمی جورێن کزێ و قوپیایێ دویر بکەن.

١٣- پێتڤیێن ئەزموونێ وەك پێنڤیس، ژێبەر …هتد. دگەل خۆ ببەن.

١٤- ڕۆژێن بهێنڤەدانێ ب دەرفەت وەربگرن بۆ وان وانێت کو هنگۆ پێدڤی بباشتربوونێ هەی.

١٥- پشتی کو ئەزموون ب دوماهیک دهێت، ڤەگەرێن بۆ مال، بێهنا خۆ بدەن و خۆ ئامادە بکەن بۆ ئەزموونا ل دیفدا. چ دانوستاندنا دەربارەی ئەزموونا بووری نەکەن.

دایک و بابێن قوتابیان،

ڕۆلێ هنگو دڤێ قۆناغێدا گەلەک یێ گرنگ و کاریگەرە. هیڤیدارین زێدەتر هاروکاری و پاڵپشتیا قوتابیان بکەن، داکو ل خولا دوویێ نمرێن بلندتر و ئەنجامێن باشتر بدەستڤە بینن و بەرهەمێ ماندیبوونا چەندین ساڵان بچنن.

دایک و بابێن قوتابیان هیڤیدارین ڤان خالان بەرچاڤ وەربگرن:

١-هەردەم پاڵپشتی و هاروکاری یا قوتابیان بکەن.

٢ـ ئاخفتنێن نەخۆش یێن جوراوجور دگەل قوتابی نەکە و ل فشارێن دەروونی دویر بکەڤن.

٣ـ دایک و بابێن قوتابیان وێ چەندێ بزانن کو ھەمی قوتابیان ئاستێ زانستی و شێوازێ فێربوونا وان وەکی ئێک نیە، جوداهی یا دناڤبەرا واندا سروشتی و ئاساییە.

٤- هەردەم پاڵپشتێ قوتابیان بن، ستایشا وان بکەن و ژ سزدانێ دوور بکەڤن چونکی ئاخفتن و پەیڤێن جوان و پاڵپشتی، متمانێ و هیڤیا سەرکەفتنێ ل دلێ قوتابی ب هێز دکەت.

زانست چرایە، نیشتمان ب زانست و زانینێ هەردەم دێ ڕوون و گەش مینیت. پێشکەفتنا کۆمەڵگەهێ و شارستانیەتێ ب زانستێڤە یا گرێدایە، نیشتمانی هەردەم پێتڤی ب نفشەکێ زانا و شارەزا هەیە.
ل دۆماهیکێ، جارەکا دی گەرمترین پیرۆزهییان ئاراستەی قوتابیێن دەرچوو دکەم، و هیڤیا سەرکەفتنێ و بەختەکێ باشتر بۆ قوتابیێن خولا دوویێ بەشداری ئەزموونان دبن دخازم.