دەىێت دەستبەجێ کۆمەڵکوژییەکان ڕابگیرێت : هاوپشتی لەگەڵ ڕاپەڕین لە ئێران
ئێمە ئێستا لە ڕۆژی ١٦ی ڕاپەڕین لە ئێرانداین. ڕۆژانە هەزاران کەس بەشداری خۆپیشاندانەکان دەکەن کە زیاتر لە ١٠٠ شاری گرتۆتەوە. نزیکەی 200 کەس کوژراون و ئەم ژمارەیەش بەردەوامە لە بەرزبوونەوە لە کاتێکدا سەرکردایەتی ئیسلامی فەرمانی بە هێزە چەکدارەکان کردووە بە توندوتیژی ئەو بزووتنەوەیە سەرکوت بکەن.
خۆپیشاندەران لە شەقامەکاندا دەستگیر دەکرێن و لە ماڵەکانیانەوە دەردەهێندرێن، ئەمەش ترس و ئاژاوە دروست دەکات لە هەوڵێکدا بۆ بێدەنگکردنی بەرخۆدان.
ڕۆڵی ژنان لەم ڕاپەڕینەدا مێژوویی و چارەنووسسازە. ژنان شان بە شانی پیاوان وەستاون و سەرەڕای سەرکوتکردنی دڕندانە، ژنان و گەنجان بەردەوامن لە مانەوە لە شەقامەکاندا.
قەبارەی توندوتیژیەکانی ڕێژیم بەرگەی ناگیرێت، بەڵام لەگەڵ ئەوەشدا خەڵک بڕیارێکی ڕوونیان داوە:
تا ڕژێمەکە شکستی پێنەهێنرێت، ناگەڕێنەوە ماڵەوە. دەوڵەت هەموو هێزەکانی و سەربازە نیشتمانییەکان و گروپە نیمچە سەربازییە توندوتیژەکانی خۆی بڵاودەکاتەوە، بۆ هێرشکردنە سەر دانیشتووان.
سەدان توخمی نیمچە سەربازیی لومپێن ڕەوانەی خۆپیشاندەران کراون بۆ ئەوەی ڕاستەوخۆ ڕووبەڕووی خۆپیشاندەران ببنەوە، ئەمەش بووەتە هۆی برینداربوون و گیانلەدەستدانی سەدان کەس.
ئەم گروپانە زۆرجار بە جلوبەرگی مەدەنییەوە بەشداری خۆپیشاندانەکان دەکەن. ئەوان بە ئەنقەست لە ڕێگەی زەلیلکردنی گشتی و ناوهێنان و شەرمەزارکردن و هێرشی جەستەیی ژنان دەکەنە ئامانج.
لە هەندێک حاڵەتدا ژنانی گەنج بۆ تیرۆرکردنی کۆمەڵگا و ناچارکردنی خەڵک لە شەقامەکان ڕفێنراون و دەستدرێژییان کراوەتە سەر.
لە هەمان کاتدا زۆرێک لە گرتە ڤیدیۆییەکان نیشان دەدەن کە خۆپیشاندەران بەتایبەتی لە نەوەی گەنجەوە چالاکانە ژنان و کچان دەپارێزن. ئەم خۆپاراستنە شۆڕشگێڕییە خۆبەخۆ نییە؛
لە ڕێگەی ساڵانێک لە بەرخۆدانی شەقام لە دژی ڕژێم پەرەی سەندووە.
دوو ڕۆژ لەمەوبەر ڕێژیم بۆ شاردنەوەی تاوانەکانی لە جیهان ئینتەرنێتی لە سەرانسەری وڵاتدا داخست.
هاوکات هێزە ڕاستڕەوەکان و زلهێزە دەرەکییەکان لەوان ترامپ و هاوپەیمانەکانی وەک نەتانیاهۆ، بە درۆ خۆیان وەک لایەنگری ناڕەزایەتییەکان نیشان دەدەن.
ئامانجیان ئازادی نییە بۆ خەڵکی ئێران، بەڵکو ڕفاندنی ڕاپەڕین بۆ بەرژەوەندییە سیاسییەکانی خۆیانە. لە ڕێگەی پەیامی فریودەرەوە هەوڵ دەدەن شۆڕش بەرەو پڕۆژەیەکی تری سەپێنراوی ڕژێمگۆڕین ئاڕاستە بکەنەوە، ئەمجارەیان هەوڵی گەڕاندنەوەی ئەو دەسەڵاتە پاشایەتییە دەدەن کە خەڵک خۆی بە قوربانیدان و خەبات ڕوخانی.
واقیع لە شەقامەکاندا لە بنەڕەتدا جیاوازە لە ئەجێندای هێزە ڕاستڕەوە توندڕەوەکان. هەزاران خوێندکار و پزیشک و پەرستار و مامۆستا بەشداری خۆپیشاندانەکانیان کردووە و دروشمی “ئازادی” و “هەموو دەسەڵات بۆ گەل”یان وتووە.
پەیامەکەیان ڕوونە: تەنیا لە ڕێگەی خەبات لە شەقام و پشتبەستن بە دەسەڵاتی دەستەجەمعی خۆمان دەتوانین مافەکانمان بەدەست بهێنین.
هێزە سۆسیالیستی و چەپەکان ئەم ڕێبازە بەرەوپێش دەبەن، لە کاتێکدا گروپە ناسیۆنالیست و پاشایەتییەکان پاڵدەنێن بۆ گەڕانەوە بۆ دیکتاتۆرییەت.
ململانێی نێوان ئەم دوو ئەڵتەرناتیڤە تادێت چڕتر دەبێتەوە.ئەم ڕاپەڕینە لە چاو ڕاپەڕینەکانی پێشوو بەرفراوانتر و بەهێزترە، بەڵام مەترسی توندوتیژیی جەماوەری لەلایەن سپای پاسداران و هێزە نیمچە سەربازییەکانەوە لە ڕادەبەدەر بەرزە.
دەکرا کوشتنی زیاتر بە تایبەت ژنان و گەنجان بکرێتە بیانوو بۆ سەرکوتکردنی بێ وێنە. بۆیە هاوپشتی نێودەوڵەتی و کردەوەی بەپەلە لەلایەن ڕێکخراوەکانی مافی مرۆڤ و مافی ژنانەوە لە هەموو کاتێک پێویستترە.
ڕاگرتنی کوشتنی خۆپیشاندەران دەبێت ئەولەویەتی باڵا بێت.
کرێکاران، ژنان، خوێندکاران، خانەنشینان و زیندانیانی سیاسی، کە زۆرێکیان زۆر بەر لە ئەم ڕاپەڕینە خۆڕاگر بوون، ئێستا لە بزووتنەوەیەکی بەهێزدا یەکگرتوون بۆ کۆتاییهێنان بە ڕژێمە.
کە بەدیلێک کە دەبێت بەرگری لێ بکەین ڕوونە: داهاتوویەک کە لەسەر بنەمای ئازادی، یەکسانی، ئاسایشی ئابووری و مافە کۆمەڵایەتییەکان دامەزراوە.
با بە توندی بۆ ئەم بەدیلە بوەستین: حکومەتێکی شورایی .
با دەنگی ژنان و هەموو ناڕازییان بین لە خەباتی تێکشکاندنی ڕێژیمی ئیسلامی لە ئێران.
دڕندەیی ڕێژیمی ئێران شەرمەزار بکەن.
واز لە کوشتنی خۆپیشاندەران بێنن.
ئیعدامەکان ڕابگرن.
ئێستا هەموو زیندانیانی سیاسی ئازاد بکەن.
سەرکەوتوبێت سۆسیالیزم!
هەلالە تاهیری. ئەندامی کۆمیتەی ناوەندی حزبی کۆمۆنیستی کرێکاری-حیکمەتیست
دامەزرێنەری ڕێکخراوی ژنان و کۆمەڵگای ڕۆژهەڵاتی ناوەڕاست-MEWSO
11/01/2026