نطلع نتشعبط عالحيط

#لفداوي
نطلع نتشعبط عالحيط
بالكِشي نولي جنـحاوي
نـركّز كَلّميّـه ع الزِّيت
لكن مانيشي فوْضاوي
تعلّمت اننقّـص وانـْزيد
وانسّايسْ ديما لِخطاوي
جيوبلي انحطّ الجاكيت
الهيْـيـَه نهـيّرْ شتّاوي…
نتعلم كي انشدّ الخيط
والإبـره تِرقّـع واتداوي
بالخبرة فهمت وحبّيت
كيفـاش يِطـرّز لفداوي
يحكي على قلعة تكريت
والحكمه في خيال الراوي
منْ توّه كي ضاع الصّيت
نتخبى في جراب الحاوي…
لازمني نعـمل مهبـول
صومالي نردّو هنداوي
صفّقلو يشطحلك طول
رُمبا ودويك وعرضاوي
لا نخلّي بـابي محلول
لكـلام الشيخ الربعاوي
كي يقولي وعدك مقبول
غير بخّـر دارك بالجاوي
ما انتبع كان ولد أصول
نِـفرز مالصّانع مِـالهاوي
وإن شا الله عندي لقبول
وطريقي في الظلمَا ضاوي
….
#ليلى_السليطي