لەهەڵبژاردنەکان ئەگەر هێرش و پەلامار نەبوبێت بۆ سەر ژیانی خەڵک بەدڵنیای بەخشەری ئاسودەی ژیانێکی باشتر نەبوە بۆ خەڵک!
ماڵپەڕی ئەڵتەرناتیڤی شورایی ئەم جارە دۆسیەکی ئامادەکردووە سەبارەت بە گرنگی هەڵبژاردنەکان لەعیراق و کوردستان وکاریگەری لەسەر ژیانی خەڵک،چەند پرسیارێکمان ئامادەکردووە بۆ هەڵسوڕاوانی سیاسی وچالاکوانانی مەدەنی ومافەکانی مرۆڤ کە بەپێکهاتووە لە /
*ــ تاچەند هەڵبژاردنە یەک لەدواییەکەکانی عیراق وکوردستان کاریگەریان هەبووە لەسەر گۆڕینی ژیانی خەڵک لەنەهامەتیە جۆراوجۆرەکان بۆ ژیانێکی شایستەی ئینسانی؟
*_نەبوونی ئازادی و نان وکارو ژیانێکی شایستە بە خەڵکی عیراق وکوردستان ، هۆکارە سەرەکیەکان دەگەڕێنەوە بۆچ، ئایا سیستەمی ئیدارەدانی دەوڵەت لە عیراق چ جۆرە سیستەمێکە؟
*ــ چ جۆرە سیستەمێکی گونجاو هەیە بۆ ئیدارەدانی ژیانی خەڵک ،بەڕای ئێوە بەدیل چیە لەبەرامبەر بە سیستەمی پەرلەمانی لە عیراق؟
ئامادەکردنی هاوڕێیان /
-ئاوات ڕەسوڵ
-عمر چاوشین
بەشی چوارەم و کۆتایی
محمودی حلاق سەبارەت بە وەڵامی ئەڵتەرناتیڤی شورایی پێی وایە کە
سەرەتا دەبێت حەقیقەتی سیاسەتی هەڵبژاردن و سیستەمی پەرلەمانی ڕابکێشینە دەرەوە بۆئەوەی ئامانجەکەی دەستنیشان بکرێت لەبەرامبەر خەڵکدا..
هەڵبژاردن کایەیەکی سیاسی یاساییە بەدەست سیستەم و دەسەڵاتی سەرمایەوە بۆشەرعیەتدانەوە بەدەسەڵاتی خۆیان لەبەرامبەر خەڵکدا، ئەمەشیان ناوناوە دیموکراسی و تاکەکان سەرپشک و ئازاد ئەکەن بەناوی ئازادییەوە بۆ هەڵبژاردنی کەسێک بۆناو پەرلەمان..
پەرلەمانیش دەزگایەکی تەنفیزی و تەشریعییە بۆ ئەو یاساو بڕیارانەی کە ژیانی خەڵک لەوپەڕی نەهامەتیدا ڕادەگرێت..
تاکەکان کەسێک ئەکەن بەپارێزەرێک کەبەناوی ئەوانەوە، مووچە، سەفەرو سیاحە، ژیانێکی فوق العادە باش، خانەنشینی زەبەللاح، تێرو تەسەل و خاوەنی ئیمکاناتی زۆر باشی ماددی لەجیاتی دەنگدەر وەربگرێت وخۆیشی بچیتەوە بۆماڵەوە سەیرکەر بیت و دواتریش دادوبێدادی هەبێت لەژیان و گوزەران و چارەنوسی..
پەرلەمان دەخالەتی خەڵک لەژیانی خۆیدا ناهێڵێت و هەر ٤ ساڵ جارێک بەدەنگی خۆی خۆی کەلەبچە دەکات و دەبێت بێدەنگ بێت، خۆپیشاندان نەکات، فشار نەخاتە سەر دەسەڵات، داوای ماف و خواستەکانی نەکات، ملکەچ بکات لەبەرامبەر ژیانی ناهەموارو پڕ کێشەی، چونکە نوێنەر یان پارێزەرێکی هەیەو لەجیاتی ئەو بڕیار ئەدات، لەجیاتی ئەو ژیانی خۆش ئەژی، پەرلەمان بڕیاری جەنگ ئەدات، بڕیاری چەند ژنە دەرئەکات، بڕیاری نیوەمووچەو چارەکە موچە دەرئەکات، بڕیاری بەکۆمپانیاکردنی سێکتەرەکان دەرئەکات، بڕیاری بەکۆمپانیاکردنی داوودەرمان، خۆراک و لەیەک ووتەدا بڕیاری بەکۆمپانیا کردنی ژیانی خەڵک دەرئەکات بەبێئەوەی دەنگدەر ڕازی بێت، چونکە دەنگیداوە بەنوێنەرەکەی لەپەرلەمان ونابێت قسە لەسەر ژیانی خۆی بکات.
بەم مانایە پەرلەمان نەک ژیانی خەڵک ناگۆڕڕێت بۆ ژیانێکی باشتری ئینسانی، بەڵکو ڕاستەخۆ سیاسەتێکی ئاشکرای وێرانکردنی ژیانی خەڵکە بەیاسا.
لە وەڵامی هۆکاری سەرەکی نەبوونی ئازادی و ژیانێکی باشتر لەعێراقدا محمود حەلاق دەڵێت بەندە بەسیستەمی حکومڕانی سەرمایەداری و دەسەڵاتە قەومی و ئایینیەکەیەوە نەک لایەنە ئیدارییەکەی.
هەتا ئەوانیش لەسەرکار بن، ژیانی خەڵک لەئێستا باشتر نابیت.
بە بۆچوونی محمود حەلاق : باشترین سیستەمی گونجاو، یەکەم شت لەڕیشەوە گۆڕینی دەسەڵاتی سەرمایەیە لەعێراقداو لەشوێنیدا دەسەڵاتی گشتی خەڵک لەناو شورای واقیعی خۆیدا کەخۆی بتوانیت حکومڕانی خۆی بکات.
ئەم پرسیارە قسە زۆر هەڵدەگرێت و پێموایە لێرەدا جێگای نابێتەوە کەباسی میکانیزم و نەخشەڕێگای ئەو دەسەڵاتدارییەی خەڵک بکەین.
حەسەن مارف دەڵێت /هەڵبژاردنەکانی لەهەرێمی کوردوستان ولە عێراقیش نەک تەنها لەدوای ساڵی 1992 لەساڵانی پێشوتری بەعس بەناوی هەڵبژاردنی ئەنجومەنی یاسادانان و ئەنجومەنی جێ بەجێکرد (إنتخابات المجلیس التشریعی و تنفیزی ) بۆ فشار خستنە سەر خەڵکی دەروەی دەسەڵات و زەحمەتکێش و کرێکاران بوە ، هیچ کات و هیچ کام لەهەڵبژاردنەکان ئەگەر هێرش و پەلامار نەبوبێت بۆ سەر ژیانی خەڵک بەدڵنیای بەخشەری ئاسودەی ژیانێکی باشتر نەبوە بۆ خەڵک.
سەبارەت بە هۆکاری سەرەکی نەبونی نان و کار و ژیانێکی ئازاد حەسەن مارف گوتی دەگەڕێنمەوە بۆ ئەو جۆرە لەسیستمی بەڕێوەبردن ئەکرێت لەڕیز بەندی سیستمی سەرمایەداری ڕیز بەند کرێ بەڵام لەهەرێم دەسەڵاتێکی چەتگەری بنەماڵیە ، لەعێراقیش هەرچی لەڕووکاردا دەسەڵاتێکی پەرلەمانی بەڕێوەی دەبات بەڵا م لەڕاستیدا ئەمەڕوکەشە کەدەسەڵاتێکی مەزهەبی و تافیەو دەسەڵاتێکی کە یە فەرمان بە پەرلەمان و ئەنجومەنی وەزیران دەدات دەوڵەتی قوڵە لەدەروە عێراق بەڕێوەدەبرێت .
حەسەن مارف پێی وایە کە سیستمێک بەگونجاو دەزانێت بۆ بەڕێوەبردنی کۆمەڵگا دەسەڵاتی خەڵک بێت دەسەڵاتەکان شۆڕبوبێتەوە بۆ تاکی کۆمەڵگا جائیتر ئەم جۆرە لەبەڕێوە بردن ناودەنرێت دەسەڵاتی شورای دەسەڵاتی خەڵک بۆ خۆبەڕێوە بەری یان خۆسەری دیموکراتی.