ئایا قوربانی دەبێ وابێ؟!
ئیدرس مستەفا
تیرۆرکردنی کوردانی سیاسی لە ئەوروپا یەکێکە لەو بابەتانەی کورد دەتوانێ بیکات بە ئاوێنەیەک و پیشانی جیهانی بدات کە چۆن قوربانی سیاسەتە فاشیەکانی دەوڵەتی تورک و فارس و بێ هەڵوێستی وڵاتە ئەوروپیەکانە، بەڵام ئایا قوربانی ئەوەیە کە ئێمە چەند رۆژێکە دەبینین؟ بێگومان نەخێر.
ئەوەی کوردانی پاریس دەیکەن دەربڕینی توڕەیی نیە لەو کارە بەڵکو پیشاندانی ئەو بێ دەسەڵاتیەیە کە گەر منیش دەسەڵام هەبێ ئەوا منیش توندوتیژم و دەست ناپارێزم. گوزارشت کردن لە توڕەیی لە حاڵەتێکی ئاوهادا دەبوو بە هێمنی و رێپێوانی دوورودرێژ بوایە تاکو جیهان بزانن کە قوربانیەکان ئەو کەسانەن لە دەست توندوتیژی رایان کردووە نەک خۆیان توندوتیژی بنوێنن بەتایبەت بۆ حاڵەتێکی وەک فەرەنسا و بوونی کورد لەوێ نەدەبوو هەرگیز پەرچەکرداریان ئەوەبوایە کە وا لەسەر جادەکان دەیانبینین.
بۆ خۆشمان ئەو پرسیارە دێتە پێشێ باشە گەر ئەمانە دەسەڵات بگرنە دەست دەبێ شێوازی دەسەڵاتەکەیان چەندە توندوتیژی لەخۆ بگرێ.
ئەم کەلتورە لەسەر جادەوە ئاوێتەی دەسەڵات ببێ ئێجگار خراپە. ئەو میتۆدە سیاسی و ئەو جۆرە لە رابەرایەتی کردن خزمەت نە بە روحی ئەو قوربانیانە دەکات و نە دیمەنێکی جوانیش لە دەم و چاوی سیاسی کورد پیشان دەدات و نە هاوسۆزی و هاودەنگی زیاتر بۆ کورد و کێشەکەی زیاد دەکات .
مێژوو ئەوەمان پێدەڵێت کە قوربانی گەر ئاوها بێ ئەوا لە دووسبەی دەسەڵات وەرگرتنیدا ئەوا هەمان ئەو دەسەڵاتە سەرکوتکەرەی لێ دەردەچێ کە ئەوان دژی بوونە و لێی هەڵهاتوون. ئێمە دیتمان ئەوانەی شاخی ئێمە چۆن ئەخلاقیاتی شاخیان رەنگی دایەوە لە دەسەڵاتی شاریاندا.
بۆیە ئەوەی روودەدات نەدەبوو رووبدات. رووداوی ئاوها دەبوو ببوایە بە دەرفەتێکی گرنگ بۆ پیشاندانی زیاتری دەموچاوی فاشستی تورکیا و راسڕەوەکانی و هەم ئەو ئایدیایەیان بسەلماندایە کە قوربانی پەلاماردەر و توندوتیژکەر نیە. ئازایەتی و بوێری لەوەدا نیە شەقامەکان بسوتێنی لە کاتێکدا زێدی خۆتیش نیە. پێم سەیرە ئەوانەی رێکخەر و رێبەری ئەو ناڕەزایەتیانەن چۆن ئاوها وەڵام بەو دۆخە دەدەنەوە!
