ڕولێ دایک و بابێن قوتابیان پشتی ڕاگەهاندنا ئەنجامێن خولا ئێکێ
ڕۆلێ دایک و بابان پشتی ڕاگەهاندنا ئەنجامێن خولا ئێکێ گەلەک گرنگ و کاریگەرە. ئەنجامێن خاندنێ دەرفەتە بۆ ناسینا هێز و ئەوان خالێن قوتابی پێدڤی ب پەرەپێدان و باشترکرنێ هەی. هیڤیدارین دایک باب بەردەوام هاریکاری و پاڵپشتیا قوتابیان بکەن، داکو ل خولا دوویێ نمرێن بەرزتر و ئەنجامێن باشتر بدەستڤە بینن و بەرهەمێ ماندیبوونا خۆ وەربگرن.
دایک و بابێن قوتابیان هیڤیدارین ڤان خالان بەرچاڤ وەربگرن:
١-هەردەم پاڵپشتی و هاریکاری یا قوتابیان بکەن و هانبدەن ل خاندنێ بەردەوام بن.
٢ـ ئاخفتنێن دڵشکێن و بێزارکەر دگەل قوتابیان نەکەن چونکی کاریگەرییەکا خراب ل سەر دەروون و متمانەیا قوتابی دروست دکەن.
٣ـ دایک و بابێن قوتابیان وێ چەندێ بزانن کو ھەمی قوتابیان ئاستێ زانستی و شیانێت فێربوونێ وەکی ئێک نیە، ئەف جوداهییە سروشتی و ئاساییە.
٤- هەردەم پاڵپشتێ قوتابیان بن، ستایشا وان بکەن و ژ سزادانێ دوور بکەڤن، چونکی ئاخفتن و پەیڤێن جوان، هاندان و پاڵپشتی، متمانێ و هیڤیا سەرکەفتنێ ل دلێ قوتابی ب هێز دکەن.
ل دوماهیکێ، پێتڤیە بزانین کو نمرە بتنێ ئامرازەکە بۆ هەلسەنگاندنا بەشەکێ فێربوونێ، نە پیڤانا بەهاو کەسایەتیا قوتابی. سەرکەفتنا بەردەوام ب هەوڵ، ماندیبوون، پاڵپشتی و هاریکاریا دایک و بابان بدەستڤە دهێت.
وەلید محەمەد سلێمان
سەرپەرشتیارێ پەروەردەیی