کۆچا ملیۆنی و دەنگێ گەل بۆ ڕەتکرنا داگیرکاریێ

وەلید محەمەد

پشتی سەرهەلدانا پیرۆزا کوردستانێ، کو ل ڕانیە دەست پێکر و ل کەرکووکێ ب دوماهیک هات، ڕژێما بەعسا دڕندە هێرشا پێچەوانە دەست پێکرەڤە داکو جارەکا دی کوردستانێ داگیربکەتەڤە و گەلێ قەهرەمانێ کوردستانێ ئازار بدەت.

بەلێ گەلێ کوردستانێ بڕیاردا ئێدی ل ژێر سێبەرا دەستهەڵاتا ڕژێما بەعسا دڕندە نەمینیت.

ژبەر هندێ، هەمییان ڕۆژا 31ێ ئادارێ بڕیارا کۆچا ملیۆنی دا و بەرەڤ سنوورێن ڕۆژهەڵات و باکوورێ کوردستانێ چوون.

کۆچا ملیۆنی هەوارا گەلەکێ نەڕازی و زوڵم لێکری بوو، هەوارێن گەلێ کوردستانێ ب جیهانێ گەهاندن.

کۆچا ملیۆنی پشتگیریا نێڤدەوڵەتی لدیڤ خۆدا ئینا و نەهێلا دەستکەفتێن ڕاپەرینێ ب هەروە بچن و کۆمەڵگەها نێڤدەوڵەتی هاتە نەچارکرن پشتگیریێ ل کوردستانێ بکەن.

ل لایەکێ دیڤە، کۆچا ملیۆنی پەیامەك بوو بۆ جیھانێ کو گەلێ کوردستانێ برسێ، ئاوارەیی و مەرگ ل مانەڤە ل ژێر دەستهەڵاتا ڕژێما بەعس پێ باشترە.
ل وی دەمیدا، دەڤەرا دژەفڕین (کو نها ل ژێر دەستهەڵاتا حکوومەتا کوردستانێیە) دامەزرا.

هەر ل وی دەمی دانیاڵ میتران، ھەڤژینا فرانسۆ میتران، سەرۆکێ وی دەمی یێ فەڕەنسا، ئێک ل وان کەسایەتییان بوو کو ڕۆلەکێ سەرەکی و گرنگ هەبوو کو فەڕەنسا پرسا گەلێ کوردستانێ ببەتە ئەنجوومەنێ ئاساییشا نەتەوێن ئێکگرتی. ئەنجامێ وان پێکولان، دەرچوونا بڕیارا 688 بوو ل ڕۆژا 5-4-1991، یا نەتەوێن ئێکگرتی و نابیت ڕژێما بەعسا دڕندە پەلامارێن چەکداری بکەتە سەر گەلێ کوردستانێ.
هەروەسا بریار هاتەدان ب دامەزراندنا ناوچەیا ئارام ل سەر هێلا 36، و دانانا ھێزێن ھاوپەیمانان ل بنگەهێ سەربازیێ (ئەنجەرلیک) بۆ پاراستنا گەلێ کوردستانێ ل هێرشێن ڕژێما بەعسا فاشی کو ب (ھێزا چەکوشێ ئامادە) دهاتنە نیاسین.
پشتی هنگی، ھێزێن چەکداری بۆ پاراستنا هاونیشتمانیان و ڤەگەڕاندنا ئاوارەیان ل دەمێ ڤەگەڕیانێ بۆ ماڵێن خۆ هاتنە هنارتن.

کۆچا ملیۆنی هەوارو نالینێن گەلێ قەهرەمانێ کوردستانێ بوو، نیشانا ئێکڕێزیی و ئێکدەنگیا گەلێ کوردستانێ بوو.

ل هەمان دەمدا، کۆچا ملیۆنی دەنگێ ڕوون و ئاشکراو ئێکهەڵوێستیا گەلێ مەبوو بۆ ڕەتکرنا داگیرکاریێ، دکتاتۆرییەتێ، زۆڵم و ستەمێ.