شانۆی ماسکە دڕاوەکان!
زمناکۆ عزیز
کاتێک بازرگانانی ئۆپۆزسیۆن قۆرخکاریی ناڕەزایەتی دەکەن ئەم وێنەیە لوتکەی کێبڕکێی جەمسەرەکانی ئۆپۆزسیۆنی حیزبی و میدیایی نیشان دەدات؛ دیمەنێک کە تێیدا بزوێنەری سەرەکی، نەهێشتنی ستەم و هەژاری نییە، بەڵکو شەڕی قۆرخکردنی بازاڕی ناڕەزایەتییە.
کاتێک شاسوار عەبدولواحید لایەنە بچووکەکان بە “سواڵکەری پۆستی وەزاری” ناو دەبات و عەلی حەمەساڵحیش ئەو بە “خۆفرۆشێکی جەمسەرگرتوو لە زینداندا” وەسف دەکات، پەردە لەسەر ڕاستییەکی مادی لادەچێت: هەردوو لایەنەکە ڕاست دەکەن، بەڵام تەنیا نیوەی ڕاستییەکە دەڵێن.
با لێرەدا کەمێک ووردتر سەیرێکی ئەم بازاڕی موزایەدەیەی نێوانیان بکەین:
١. ناڕەزایەتی وەک “کەرەستەی خاو”ی بازرگانیی سیاسی بۆ هێزە پۆپۆلیستی و میدیاییەکان، تووڕەیی و برسییەتیی خەڵک هاوشێوەی “نەوت و داهاتی گومرگ” وایە؛ کەرەستەیەکی خاوە کە بەکاریدەهێنن بۆ بەرزکردنەوەی بەهای خۆیان. شاسوار: ئەو دەیەوێت هەموو دەنگە ناڕازییەکان لە چوارچێوەی یەک کۆمپانیا یان یەک حیزبدا قۆرخ بکات.
کاتێک ڕکابەرێکی نوێ (وەک ڕەوتی هەڵوێست) دەردەکەوێت، شاسوار وەک “هەڕەشەیەک بۆ سەر پشکی بازاڕەکەی” سەیری دەکات. هێرشەکەی بۆ سەر حیزبە بچووکەکان بۆ پاراستنی خەڵک نییە، بەڵکو بۆ ئەوەیە دڵنیا بێت کە تەنیا خۆی وەک “بریکاری تاقانەی ناڕەزایەتی” دەمێنێتەوە تا کاتی مامەڵە گەورەکان لەگەڵ دەسەڵاتدا، گرانتر خۆی بفرۆشێت. ستراتیژیی عەلی حەمەساڵح: ئەویش کەرەستەی خاوی خۆی لە “ئاشکراکردنی گەندەڵی و مۆڕاڵی پاک”دا دەبینێتەوە. ئەو دەزانێت تاکە چەکێک کە بتوانێت لێدانی کوشندە لە ئیمپراتۆریەتە میدیاییەکەی بەرامبەرەکەی بدات، دەرخستنی ئەو پەیوەندییە مادییە ژێرپەردەیانەیە کە لە کاتی تەنگانە و زیندانیکردندا لە نێوان سەرمایەداریی پۆپۆلیستی و هێزە چەکدارەکاندا دروست دەبێت.
٢. فەرهەنگی پاشقولگرتن: کاتێک کێکەکە بچووک دەبێتەوە بۆچی ئەم تەقینەوە گوتارییە ئێستا ڕوودەدات؟
چونکە پێکهاتەی ئابووری و سیاسیی هەرێم چیتر بەرگەی دابەشکردنی ئیمتیازات بەسەر هەموو ئەم نوخبە ناڕازییانەدا ناگرێت. کاتێک دەسەڵاتی مەرکەزیی حیزبی، گوشارە مادییەکان توند دەکاتەوە (لە ڕێگەی دادگاکان، دۆسیەی باج، و کەمکردنەوەی پۆستەکان)، ئیتر بەرەی ئۆپۆزسیۆنی ڕووکەش لێک هەڵدەوەشێت.
ئەوان لەبری ئەوەی چەکەکانیان ئاراستەی “سەرچاوەی سەرەکیی تاڵانییەکە” بکەن، دەست دەکەن بە پاشقولگرتن لە یەکتری. ئەمە شەڕی “ڕیسایکلکردنی دەموچاوەکان”ە، هەرلایەکیان دەیەوێت گوناهی داڕمان و بێهێزیی ئێستای دۆخەکە بخاتە ئەستۆی ئەوی تریان.
٣. دوو ڕووی یەک دراوی مادی ئەم ململانێیە دەیسەلمێنێت کە ئێمە لەبەردەم دوو مۆدێلی جیاوازی هەمان سیستەمداین: سەرمایەداریی پۆپۆلیستی (شاسوار): کە تێیدا میدیا و پڕۆژە بازرگانییەکان بەکاردێن بۆ کۆنترۆڵکردنی سۆزی گەنجانی بێکار، بەڵام لە کاتی پێویستدا ئامادەیە لە پشت پەردەوە لە پێناو پاراستنی پشکەکانی سازش لەسەر دەنگی خەڵک بکات.
ئایدیالیزمی پەرلەمانی (عەلی حەمەساڵح): کە تێیدا ڕەخنەی توند دەگیرێت، بەڵام چونکە لە دەرەوەی ژێرخانی ئابووری و بەبێ هێزێکی مادیی ڕێکخراو کار دەکات، هەمیشە لە بازنەی هاوارکردن و پاشەکشەدا دەمێنێتەوە و ناتوانێت ببێتە بەدیلێکی ڕاستەقینە.
تراجیدیای مرۆیی لێرەدایە: جەماوەری چەوساوەی کوردستان، لەبری ئەوەی ببێتە “بکەری هۆشیار و خاوەن بڕیار” کە کۆنتڕۆڵی نان و ژیانی خۆی بکات، کراوەتە “تەماشاکەرێکی بێهێز” لە شانۆیەکدا کە تێیدا پاڵەوانەکانی دوێنێ، خەریکی ژماردنی دەفتەرە دۆلارەکان و دۆسیە شاردراوەکانی یەکترین.
ئەم فەزای موزایەدە، گەورەترین خزمەت بە دەسەڵاتی حاکم دەکات؛ چونکە خەڵک تووشی جۆرێک لە “بێهیوایی گشتی” دەکات کە وایان لێدەکات بڕوا بکەن “هەمووان وەک یەکن و هیچ ئاسۆیەکی گۆڕانکاری بوونی نییە”.
تا ئەو کاتەی ناڕەزایەتیی شەقام لە چنگی ئەم بازرگانە میدیایی و پەرلەمانییانە دەرنەهێنرێت کە کەرامەتی خەڵک دەکەنە سووتەمەنی بۆ شەڕە شەخسییەکانیان، مەکینەی بەرهەمهێنانەوەی هەژاری لەلایەن دەسەڵاتەوە هەر بەردەوام دەبێت.
