ڕاگەیاندنی کۆتایی هاتنی کاری سیاسی و رێکخراوەیی بە ناوی “یەکێتی کۆمۆنیستەکان”
رێکەوتی ٢٧/٩/٢٠٢٥، رێکخراوی “یەکێتی کۆمۆنیستەکان لەعێراق”، کۆنفرانسی پێنجەمی گرێدا، کۆنفرانس بە خولەکێک بەپێوە وەستان بۆ گیانی پاکی هاوڕێیانێک کە لەژیاندا نەماون وە تەواوی گیانبەختکردووانی رێگای ئازادی و یەکسانی و ژیاندۆستی، دەستیپێکرد و پاشان بەرنامەی کارەکانی بەڕێوەبرد کە بریتی بوون لە:
١- راپۆرتی کارەکان لە بوارەکانی سیاسی، رێکخراوەیی و دارایی.
٢- بڕیاردان لەسەر چارەنووسی رێکخراو.
٣- چۆنێتی بەردەوامیدان بە کار و پەیوەندی خەباتکارانەی هاوڕێیان و پاراستنی مومتەلەکات و بەڵگەنامەکان. لەبارەی هەریەک لەوانەوە بەگوێرەی پێویست تاووتوێ و هەڵسەنگاندن و ئەنجامگیری کرا.
سەبارەت بە رێکخراو، کۆنفرانس بە تێکڕای دەنگی بەشداربووان، بڕیاری دا لەسەر کۆتایهێنان بە کاری سیاسی و رێکخراوەیی بەناوی، “یەکێتی کۆمۆنیستەکان” کە لەڕێگەی ئەم راگەیاندنەوە بۆ ئاگاداری و رای گشتی ڕادەگەیەنین.
رێکخراوی “یەکێتی کۆمۆنیستەکان لە عێراق” لە ٩/٩/١٩٩٨دا لەسەر دەستی دەیان کادر و هەڵسوڕاوی کۆمۆنیست لە شار و شارۆچکە جیاوازەکانی کوردستان، بۆ بنیاتنانی رێکخراوێکی مارکسیستی شۆڕشگێڕی نوێ دامەزرا، بۆ گەشە و پەرەپێدانی سیاسی و رێکخراوەیی خۆی، هەوڵیداوە کەڵک لە دەسکەوت و ئەزموونە سیاسیەکانی مارکسیزم و بزووتنەوەی ئازادیخوازی دنیا وەربگرێت و بیخاتە خزمەتی بەرەوپێشچوونی کار و خەباتی بزووتنەوەی سۆسیالیستی و ئەنجامدانی گۆڕانکاری لە عێراق و کوردستاندا. بۆ ئەو مەبەستانە چەندین وەرگێران و راگەیاندن و بڵاوکراوە و نامیلکەی بە زمانی کوردی و عەرەبی پەخشکردووە و بنکە و بارەگای رێکخراوەیی سەرەتا لە سلێمانی و دواتر لە شارەکانی کەرکوک و بەغداد دامەزراندووە، لە کاروانی خەبات و تێکۆشانیدا ویستگەی جۆراوجۆری بڕیوە و بۆ زۆر شوێن و جێگا پەلی هاویشتووە و سەدان تێکۆشەری دڵ پڕ لە ئومێدی ئازادی و ژیانخوازی بەشدارییان تێداکردووە.
هەر لەسەرەتاوە وەک رێکخراوێکی سیاسی واقعبین، بەربەست وسنورەکانی گەشەکردنی بزووتنەوەی سۆسیالیستی ناسی و زوو لەوە تێگەیشت کە نوێبوونەوە و پێداچوونەوە و کرانەوەی هزری و مروونەتی رێکخراوەیی بۆ تێپەڕکردنی سونەت و کاری نەریتی لەپەیوەند بە خەباتی سیاسی و شێوەی کاری ڕێکخراوەیی و حزبیەوە، یەکێک لە ئەرکە گرنگ و لەپێشینەکانە، وە ئەوەش پێویستە کە هەنگاوەکانی پاڵپشت بێت بە بەرنامە و پرۆگرامی سیاسی نوێی جیاواز لە بەرنامە سیاسیە نەریتیەکانی پێشوو.
لە یەکەم کۆنفرانسی دامەزراندنیدا جەخت لەسەر ئەوەبوو وەک رێکخراوێکی سیاسی نوێ لەناو رەوتی ”کۆمۆنیزمی کرێکاری”دا جێگاپێی خۆی بکاتەوە و هەوڵبدات بەشێکی چالاک و کارا بێت لە وەڵامدانەوەی بنبەست و کێشە و کەموکوڕیە سیاسی و هزری و رێکخراوەییەکانی و گرفتە ستراتیژیی و تاکتیکیەکانی، بەڵام بە تێفکرین و وردبوونەوە و ئەزموونی زیاتر دەرکەوت بەرنامە و باسەکان و ئاراستە و نەریتە سیاسیەکانی ئەو رەوتە تێکڕا تێگەیشتن و دنیابینیەکی نوێ و جیاواز بۆ مێژووی کۆمۆنیزم و مارکسیزم و چالاکی و هەڵسوڕانی سیاسی چەپ دەخەنەڕوو کە ناتەبایە لەگەڵ مارکسیزم و کۆمۆنیزمی بنەڕەتی و لەگەڵیدا یەکناگرێتەوە. لەسەر ئەو بنەمایە لە کۆنفراسی دووەمدا دەستبەرداری شوناس و رێبازی کۆمۆنیزمی کرێکاری بوو، پێداگری کرد لە سەر شوناسی کۆمۆنیستی و مارکسیستی بەبێ هیچ پاشگر و پێشگرێک و وەک رەوتێکی سۆسیالیستی باوەڕدار بە ئازادی و کاری پێکەوەیی و یەکێتی تێکۆشان خۆی ساغکردەوە.
لەدوای کۆنفرانسی سێهەم و بەمەبەستی خۆئامادەکردن بۆ قۆناغی دوای رووخانی رژێمی بەعس، بەشداری دەستپێشخەرانەی کرد لە پرۆژەی “کاری هاوبەشی چەپ”دا بەئامانجی یەکگرتووبوونی بزووتنەوەی چەپ و کۆمۆنیستی، لە سۆنگەی باوەڕبوونی بە سروشتی ئازادیخوازانەی پارت و کۆمەڵە سیاسیەکان تێکۆشینی خۆی دەستپێکرد بۆ قبووڵکردنی دیاردەی فرەڕێکخراوەیی و فرەحزبی و بوونی خەت و بەرنامەی کاری سیاسی- ئایدۆلۆژی جیاواز لەناو بزووتنەوەکەدا و تەنانەت لەناو یەک رەوت و رێکخراوی سیاسی سۆشیالیستی و کۆمۆنیستیدا. هەروەها لە کات و ساتی جیاوازدا پڕۆژەی جیاوازی بۆ کاری هاوبەش پێشکەشکردووە تا ئاستی دەستبردن بۆ پێکهاتەی سیاسی نوێی هاوبەش بە جیاوازی مەیل و بۆچوون و شوناسیانەوە.
کۆنفرانسی چوارەم دوای رووخانی رژێم، قۆناغی پەلهاویشتنی رێکخراو بوو بۆ قووڵایی عێراق و دەرکەوتنی وەک رێکخراوێکی عێراقی کە تارادەیەک رەنگدانەوەی لەسەر پەیوەندییەکانی لە جیهانی عەرەبیشدا هەبوو.
پڕۆژەی دروستکردنی “پارتی سیاسی بنکەفراوان” لەگەڵ لایەن و کەسایەتی تر، بوو بە یەکێک لە مەیدانە گرنگەکانی هەڵسووڕانی ئەم رێکخراوە و وێستگەی جۆراوری بەخۆوە بینی، پرۆژەی سیاسی – هزری و تۆڕەکانی بەرەنگاری کە ژمارەیەکی بەرین لە کادر و هەڵسوڕاوی بە ئەزموون و جیلێکی نوێی لە تێکۆشەری سۆسیالیستی روناکبیری لەخۆگرتبوو، وە هەوڵی یەکگرتن و پەیوەندی خەباتکارانە لەگەڵ چەند رێکخراوی دی و.. …تاد بەهەنگاوی گەورە بەرەو پێشچوون، هەرچەند بەهۆی کاریگەری روانگە نەریتیەکان و خواستی دەستپێوەگرتن و پاراستنی شوناسەکانی پێشوو، وە کۆپیکردنەوەیان لەناو پرۆژە سیاسیە هاوبەشەکاندا، ئەو هەوڵانە بۆ دامەزراندنی کۆمەڵەی سیاسی گەورەتر و فراوانکردنەوەی کۆڕی خەبات و رووخاندنی دیوارە رێکخراوەییە بەرتەسکەکان، گەیشتن بە بنەبستی سیاسی و رێکخراوەیی، بەڵام هەموو ئەوانە زنجیرەیەک ئەزموونی یەک لەدوای یەک بوون کە سەرجەمیان بوون بە مایەی تێهەڵچوونەوە و پێداچوونەوە و رەخنەلەخۆگرتن، کۆمەڵە ئەزموونێک بوون کە بەرۆشنی نیشانیاندا رێکخراوە ئایدۆلۆژی و نەریتیەکان و سنوورە رێکخراوەییەکان هاوکار و یارمەتیدەر نین بۆ یەکڕیزی و یەکگرتوویی فراوانتر بەڵکو تا رادەیەکی زۆر رێگر و لەمپەر پێکدەهێنن و بەبێ هەڵوەشاندنەوە یان کەنارخستنیان زۆر دژوارە تێهەڵچوونەوە و دەستپێکردنەوەیەکی نوێ.
خۆپیشاندان و خەباتی جەماوەری روولەسەری خەڵکی کوردستان و عێراق، پاشان رووداوە سیاسیەکانی بەهاری عەرەبی، وە سەرهەڵدانی جوڵانەوەکانی ١٧ شوبات و رۆژانی دوایی، دروستبوونی رێکخراوەی سیاسی نوێ لە کوردستان (مۆدێلی پەرلەمانی)، … کۆمەڵە رووداوێکی سیاسی دیکە بوون کە وایدەخواست رێکخراوە کۆمۆنیست و چەپەکان بەخۆیاندا بچنەوە و چاو بخەنە سەر ئەو گۆڕانکاریانەی بەسەر ژیانی سیاسیدا هاتووە و خەڵک وەک بکەرێکی سیاسی گەورەتر و گشتی تر ببینن، کە بە توانا و ئامادەیی زۆرەوە هاتۆتە مەیدان، بەجۆرێک کە خەریکە کەمینەگەری سیاسی ڕاست و چەپ تێپەڕدەکات، وەک پێشووتر بوارنادات بە قۆرخکاری و پاوانکردنی نەریتی حیزبە سیاسیەکان. هەروەها بەرەنگاربوونەوەی ستەمکاری سیاسی بە شێوە و فۆرمی جیاوازی شەعبی لە گەشەکردندایە و یەکێک لە پێشڕەوییەکانی ئەوەیە لە هەژموونی کەمینە سیاسیەکان و پارتە نەریتیەکان دەرباز بێت و خواستی خەڵک بۆ ژیانێکی نوێ لە پانتاییەکدا بەرەوپێشبچێت کە تیایدا مرۆڤەکان وەک بکەرێکی سیاسی، بەشێوەی تاک و بەکۆمەڵ چالاکی بنوێنن. پارت و رێکخراوە سیاسیەکان ئەگەر نەتوانن رۆڵی ئەو بکەرە مرۆییە لە ژیانی سیاسیدا وەک چەق و تەوەر ببینن و وەک هێزێکی سیاسی هۆشیار و بنیاتنەر بۆ دامەزراندنی کۆمەڵگایەکی ئازاد و سیستمێکی سیاسی مرۆیی نەیناسن، بەکردەوە لە پەراوێز یان لە دەرەوەیدا دەمێننەوە.
لەکاتێکدا کە روونتر و شەفافتر دەرکەوتووە مرۆڤەکان بەشێوەیەکی گشتی مێژووی خۆیان دروستدەکەن و خۆیان بکەر و ئامرازی هەموو گۆڕانکاریەکانن، وە مرۆڤی ئازاد و بە ئیرادە و بە ئومێد و ئازادیخواز داینەمۆ و پێشەنگی ئەو کارەن، ئیتر پڕۆژە و بەرنامە سیاسیەکان تەنها دەتوانێت بۆ ئەوە بێت ئەو هێزە گەورەیە رێکبخات و بۆ گۆڕانکاری سیاسی گەورە ئامادەی بکات و لەم بوارەدا پێشەنگی بنوێنێت.
لەم روانگەیەی سەرەوە یەکێتی کۆمۆنیستەکان لەخۆیەوە دەستی پێکردووە و بە کۆمەڵە هەنگاوێک هەوڵیداوە پرۆسەیەک لە نوێبوونەوە و خۆبنیاتنانەوە دەستپێبکات. هەڵبەت گۆڕانکاریە سیاسی و جەماوەریەکانی ناوچەکە فرسەت و بواری بۆ ئەم کارە زیاتر کردەوە و پاش رووداوەکانی بەهاری عەرەبی کرانەوەیەک دروستبوو بۆ ئاشنابوون و پەیوەندی بە رێکخراوە و کۆمەڵە سیاسیە چەپ و کۆمۆنیستەکانی رۆژهەڵاتی ناوەڕاست و ئەوروپا و ووڵاتانی تر لەگەڵ یەکتر. لەم نێوەدا یەکێتی کۆمۆنیستەکان دروستکردن و گەشەپێدانی ئەو پەیوەندیانەی کرد بە یەکێک لە مەیدانەکانی چالاکی و خەباتی خۆی، بەڵام بەهۆی جیاوازی هەڵوێست و بیرکردنەوە سەبارەت بە دۆخی سیاسی عێراق، رۆڵی ئیسلامی سیاسی لە عێراق و ناوچەکەدا و رووداوەکانی بەهاری عەرەبی و… زۆر پرسی تر، ئەو پەیوەندیانە تەنها لەگەڵ پارتی دژە سەرمایەداری فەرەنسا (NPA) و ئەنتەرناسیوناڵی چوارەم چووەپێشەوە، کە سوودبەخش بوو بۆ ناسینی ئەزموون و پڕۆژەی چەپی ترۆتسکیست و سۆشیالیستە ئازادیخوازەکانی فەرەنسا و ئانارکیستەکان وهاوکاری نێوانیان کە وەک پڕۆژەی سیاسی هاوبەش گەڵاڵەیان کردبوو بۆ گۆڕانکاری سیاسی.
ئەو گۆڕانکاریە پۆزەتیفانە، کە چەند بوارێکی گرنگی گرتبۆوە، هێشتا وەڵامدەرەوەی چاوەڕوانی و تێگەیشتنی نوێی ئەم رێکخراوە نەبوون. هەرچەند ئەو ئەزموونانەی بەگونجاو زانی بۆ بەشداریکردن و دەستپێشخەری لە دروستبوونی پارت و ناوەندی بەرەنگاری بنکەفراوان لە کوردستان بە مەبەستی بوژاندنەوەی بزووتنەوەی چەپ و سۆسیالیستی بە ئاقاری ئایدیا و بیر و هزری نوێ و هەنگاوی کرداری بۆ خۆرێکخستن لە کۆمەڵە و تۆڕە بەرەنگارەکاندا، هاوکات خوازیاری فراوانکردنەوەی هەرچی زیاتری ئاسۆی خەبات و کاری سیاسی و تێکۆشان و فەراهەمکردنی زەمینە سیاسیەکانی دەستڕاگەیشتن بوو بە ئەزموونی سیاسی نوێ، کە دواجار ببێتە هۆی تێپەڕکردنی سیستمی سەرمایەداری و فەراهەمبوونی ژیانێکی شایستە لە ئەلتەرناتیڤێکی نوێدا، بۆیە خوازیاری تێپەڕکردنی ئەزموونەکانی پێشووتر بوو چ لەسەر ئاستی لۆکاڵی و چ ناوچەیی و جیهانی، کە نەیانتوانی بوو ئەو ئامانجانە بەدیبهێنن و ببن بە شوێنگرەوەی سیستەمی باو، وە بەشێوەیەکی تر سیستەمی رەخنەلێگیراویان هەم لەناو خۆیاندا و هەم لەسەر ئاستی کۆمەڵگا ( ئەگەر هەلیان بۆ رەخسا بێت) بەرهەمهێناوەتەوە.
هەڵبەت دوای بەرخۆدانی کۆبانێ، هەروەها سەرهەڵدان و گەشەکردنی ئەزموونی رۆژئاوا ئەم رێکخراوە زیاتر پێداگربوو لەسەر ئەوەی بزووتنەوەی کۆمۆنیستی و چەپ لە گرنگی ئەم دۆخە سیاسیە نوێیە تێبگات و ئامادەکاری بکات بۆ خۆنوێکردنەوە و دەستبردن بۆ ئەزموونی سیاسی هاوشێوە لە عێراق و ناوچەکەدا.
لە سەردەمی پەتای کۆرۆنادا کاتێک کۆی ژیانی مرۆیی و کەوتە بەر مەترسی و پەیوەندی مرۆڤ لەگەڵ خۆی و ژینگەکەی بوو بە تەوەری کێشە و ململانێکان و پێداچوونەوە، ئەم رێکخراوە پێداگریی زیاتری کرد لەسەر سروشتی ژیاندۆستی و ژینگەدۆستی و کردی بە رێباز و ئاراستەیەکی سیاسی بۆ ژیانخوازی و بۆ چارەسەری زۆر پرسی گرنگی مرۆڤایەتی هاوچەرخ، پوختەی ئەوانەی لە “جاڕنامەی ژیانخوازی”دا گەڵاڵەکرا و وەک دنیابینی و جیهانبینیەکی کۆیی پەسەندیکرد.
لەماوەی ئەو کاروانە سیاسیە دوور و درێژەدا زۆر چەمک و پرەنسیپ و دیاردەی سیاسی و رێکخراوەیی، مشتومڕ و بەدواداچوون و بنکۆڵکاری و وردبینی تیایدا ئەنجامدراوە و بەکردەوە لە کارو خەباتی سیاسی رۆژانەدا رەنگیداوەتەوە. چەمکە گرنگەکانی وەک سیاسەت، حیزب، دەوڵەت، دەسەڵاتی سیاسی، پەیوەندی نێوان حیزب و دەسەڵات، بکەری سیاسی، خەباتی چینایەتی و رۆڵی چینی کرێکار، پرسی ژنان و دەرکەوتنی ژن وەک بکەرێکی سیاسی نوێ، ئەزموونە سیاسیەکان بۆ گۆڕانکاری و تێپەڕکردنی سەرمایەداری و……..تاد قۆناغ بە قۆناغ و بە گیانێکی شۆڕشگێڕانە و ئازادیخوازانەوە تێگەیشتن و ئەنجامگیری نوێیان لەبارەوە خراوەتەڕوو، هەموو ئەمانەش بەکردەوە بوون بە بابەتی ڕاگەیاندن و ووتار و نوسین و کۆڕ و سمینار و چاوپێکەوتن و رەخنەگرتن و پوختەکردنیان لەچەند نامیلکە و کتێبدا.
ئەم رەوەندە لە خەبات و پێداچوونەوە و گۆڕانکاری، هەم سیاسی و هەم عەمەلی چووەتەپێشەوە، ماوەی چەند ساڵێکە و بە دیاریکراویش لە دوای بەیانی تەموزی ٢٠٢٣ ەوە ئەم رێکخراوە بەئامانجی تێهەڵچوونەوەیەکی نوێ بۆ رێکخراو و پرۆژەی سیاسی هاوبەش و ئازادیخوازانە، پرۆسەی “خۆگۆڕین”ی خستۆتە دەستووری کاری خۆیەوە. بەپێی ئەو روانگانەی پێشوو، وە لەسەر بنەمای ئەوەی: شوناسی ئایدۆلۆژی ئەو جۆرە لە حیزب و رێکخراوی نەریتی دەسەڵاتخواز، جگە لەوەی لەڕووی نەریت و ناواخنەوە کاریان تەواو بووە و چیتر بەشێک نین لە رووداوە گەورەکان و ناتوانن هێز بە بزووتنەوە کۆمەڵایەتیەکان ببەخشن و پێشەنگایەتی بنوێنن، هاوکات بەهۆی پەیڕەویکردن لە کەمینەگەری سیاسی و شوناسە ئایدۆلۆژیەکەیانەوە، وە بەهۆی پێکهاتەکانیانەوە کە هیرارکییەت و ناوەندیگەرایی و دەسەڵاتخوازی سیستەمی باویان لە خۆیاندا بەرهەمهێناوەتەوە، دەرگیری گرفتی بونیادین و بە گۆڕانکاری سیاسی و رێکخراوەیی رووکەشانە، وە یان بە درووستکردنی رێکخستنی رووکار و واجیهە چارەسەر نابێت و کار و چالاکی سیاسی جۆرێکی تر لە خۆرێکخستنی گشتی کردووە بە پێویستی ئەم قۆناغە نوێیەی ژیانی سیاسی.
سەرەنجام ئەم ڕێکخراوە بەو بڕیارە گەیشت کە:
بەم راگەیاندنە کۆتایی بە کاری سیاسی لەژێر ناوی “یەکێتی کۆمۆنیستەکان”دا بهێنێت و ئەندامان و کادرانی بەجۆرێکی تر درێژە و بەردەوامی بە تێکۆشان بدەن کە سیاسەتی کەمینەگەری و دەسەڵاتخوازی تێپەڕبکات و بە دیدو تێگەیشتنێکی نوێ و ئینسانیەوە لە خوارەوە بۆ سەرەوە خۆڕێکخستن و رێکخستنی بەرەنگاری و ئەکتی سیاسی بەرێتەپێشەوە بۆ دروستکردنی کۆمەڵە و سەکۆ سیاسیە هاوبەشەکان و سەرڕێخستنی بزووتنەوە کۆمەڵایەتیە سیاسیەکان بۆ گۆڕانکاریە خوازراوەکان لە هەلومەرج و قۆناغە جیاوازەکاندا، وە دەستبردن بۆ ناوەند و رێکخراوە سیاسیە پێشەنگەکان کە بەم ئاراستەیە کاربکات و زەمینە و پێداویستیەکان بۆ یەکانگیری و تۆڕبەندی نێوانیان ئامادە و فەراهەم بکات.
ئەم ڕاگەیاندنە بە دیوێکیدا هەڵوەشاندنەوەی رێکخراوێکی سیاسی دیاریکراو و کۆتایی هێنانە بە کارەکانی، بەڵام هاوکات بەواتای دەستپێکردنەوەیەکی نوێیە بۆ خۆئامادەکردن و بەشداری لە پرۆسەی سیاسی، هاوڕێ لەگەڵ رەوت و گرووپ و کەسایەتی و هەڵسوڕاوانی تر، بەئامانجی خۆرێکخستنی سیاسی پێشەنگ و ئازادیخواز لە دڵی بزووتنەوە سیاسی و کۆمەڵایەتییەکاندا، ئەو بزاوت و بزووتنەوانەی خەبات و بەرەنگاری بەشێوەیەکی رێکخراو و بەپێی پلان و نەخشە و ستراتیژی سیاسی لەبەرژەوەندی زۆرینەی خەڵک بەڕێوەدەبەن و ژیانی سیاسی ئاوێتە دەکەن لەگەڵ بەها و ئایدیا و باوەڕی ژیانخوازی و دەبنە بەشێک لە خەباتی سیاسی و کۆمەڵایەتی بۆ گۆڕانکاری لە دەسەڵات و سیستمی حوکمڕانی بە ئاراستەی بەدیهێنان و گەیشتن بە سیستمێکی سیاسی مرۆیی نوێ. بکەرە سیاسیەکانی ئەم گۆڕانکاریانە بێگومان بەرەیەکن لە ئازادیخوازان و ژنان و لاوان و خەڵکی ستەملێکراو و چەوساوە.
لەم نێوەدا کەسایەتی و لایەنە چەپ و کۆمۆنیست و سۆشیالیست و ئازادیخوازەکان و هەڵسوڕاوانی بواری ماف و ئازادیەکانی خەڵک، پێویستە روو لە جیابوونەوە و پەرت بوون و کاری گرووهی و نوخبەوی و شوناسە ئایدۆلۆژی و عەقیدەتیەکان وەرگێڕن رووبکەنە یەکێتی ڕیزەکانی تێکۆشان خۆیان لەرێگەی رێکخستن و کۆمەڵە سیاسیە گشتیەکانەوە، وە ئایدیا و تێگەیشتنە سیاسیە جیاوازەکانیان لەڕێگەی دیالۆگ و هەماهەنگی و یەکانگیرکردنەوە بکەن بە بنەما و ناواخنی پرۆژە و پلاتفۆرمی سیاسی هاوبەش و یەکگرتوو.
لەکۆتایی ئەم راگەیاندنەدا کە دوایین راگەیاندنی ئەم رێکخراوەیە، هاوکاری و هاوخەباتی دۆستان و لایەنگرانمان لەماوەی ژیانی سیاسی رێکخراودا بەرزدەنرخێنین، هەروەها هاوخەباتی و تێکۆشانی هەموو ئەو هاوڕێیانە رێزلێدەگرین کە لەگەڵ ئەم رێکخراوەدا کاریانکردووە و کات و توانای خۆیان پێبەخشیوە، چ ئەوانەی وازیان هێناوە چ ئەوانەی ماونەتەوە، وە بەدیاریکراوی بۆ گیانی پاکی ئەو هاوڕێ تێکۆشەرانەی تیرۆرکراون (انصار عبدالامير مهدى)، (على حسين على صالح الدليمي -ابوحسين)، وە ئەو هاوڕێیانەی لە ژیاندا نەماون وەک هاوڕێیان (علی نملە – علاء)، (سعد محمد حسن– ابوعلی)، ( فٶاد محمد علي سامرائي – ابوهمسە-)، (عزیز محمد عبدللە – کاروان فوئاد)، سەری رێز دادەگرین و یادیان بەزیندوویی دەهێڵینەوە و پارێزەر و درێژەپێدەری ئومێد و ئامانجە ئینسانیەکانیان دەبین.
یەکێتی کۆمۆنیستەکان لە عێراق
٢٧ی ئەیلولی ٢٠٢٥