لە عێراقدا بانگەشەو پێرەوی سیستمی دیموکراسی پەرلەمانی دەکرێت، بەڵام هیزە سیاسیە دەسەڵاتدارەکان بۆخۆیان هێزی دیموکراسی نین!
ماڵپەڕی ئەڵتەرناتیڤی شورایی سەبارەت بە گرنگی هەڵبژاردنەکان لەعیراق و کوردستان وکاریگەری لەسەر ژیانی خەڵک، دیدارێکمان ئەنجامداوە لە گەڵ هاوڕێ سوبحی مەهدی ئەندامی کۆمیتەی ناوەندی حزبی شیوعی کوردستان.
ئەڵتەرناتیڤی شورایی : تاچەند هەڵبژاردنە یەک لەدواییەکەکانی عیراق وکوردستان کاریگەریان هەبووە لەسەر گۆڕینی ژیانی خەڵک لەنەهامەتیە جۆراوجۆرەکان بۆ ژیانێکی شایستەی ئینسانی؟
سوبحی مەهدی ئەندامی کۆمیتەی ناوەندی حزبی شیوعی کوردستان:ڕژێمی دیکتاتۆری بەعس، ڕژێمێکی لاکەوتە بوو لەنێوخۆی وڵات و لەدەرەوە، هێزە نێوخۆییەئۆپۆزسیۆنەکان پەرتەوازە بون و لەتوانایاندا نەبوو بە هێزی خۆیان ئەم ڕژێمە بگۆڕن، وگۆڕانکاری لەدەرەوە هات، و بەبڕیاری نێودەوڵەتی عێراق بوە وڵاتێکی ژێر سایەی داگیرکەرو ، وحاکمی مەدەنی ئەمریکا بناغەی ئەو سیستمی حوکمڕانییەی دانا.
ئەگەرچی هەرێم، تارادەیەک جیاوازی هەیە، بەهۆی هەبوونی جۆریک لە یەکگرتوویی لەبەرەی کوردستانی و پشتیوانی خەڵک بۆی، بەڵام هەلومەرجە بابەتییەکە هەرلە دەرئەنجامی شەری کەنداوەوە پێگەیشتبوو.
هەردوو شێوەی حوکمرانی نوێی دوای دیکتاتۆری، ئەگەرچی جیاوازی زەمەنی نێوانیان١٢ ساڵە، بەڵام هێز گەلێک بوون کە تەنها لەسەر کاغەز باوەریان بە سیستمی دیموکراسی و هەڵبژاردن بوو لەبنەرەتدا هێزی دیموکراسی نین و هەڵبژاردنێکیان ویستوە کە لە ئەمری واقیع و دۆخی شۆرشگیرییەوە، لەژێر ناوی دیموکراسی و هەڵبژاردنەوە هەمان دەسەڵات وەربگرنەوە و بە پاساوی شەرعیەتی گەل، دامەزراوەی یاسادان و جێبەجێکردن یاسایی بخەنەوە ژێر باڵی خۆیان ،و بۆ ئەم مەبەستەش ،هەموو شێوازێکی ناشەرعی بەکار دەهات بۆ بردنەوە.
هەموو هەڵبژاردنەکانی هەرێم و عێراق، لە ١٩٩٢ ەوە بۆ ٢٠٢٤، دوورنەبون لە ساختەکاری و پێشیلکاری یاسا مەدەنییەکانی هەڵبژاردنێکی ئازادو دیموکراسی.
لەسەر بنەمای ئەو ڕاستیانە، هەردامەزراوەیەکی یاسادانان وجیبەجیکردن ودادوەری ،ئەو ئەنجامە نادات کە حوکمڕانییەک بێنێتە بوون کە خەمی خەڵک ودادپەروەری و ژیانێکی باش و ئازادانە بێت.
ئەڵتەرناتیڤی شورایی : نەبوونی ئازادی و نان وکارو ژیانێکی شایستە بە خەڵکی عیراق وکوردستان ، هۆکارە سەرەکیەکان دەگەڕێنەوە بۆچ، ئایا سیستەمی ئیدارەدانی دەوڵەت لە عیراق چ جۆرە سیستەمێکە؟
سوبحی مەهدی ئەندامی کۆمیتەی ناوەندی حزبی شیوعی کوردستان: عێراق ووڵاتێکی دەوڵەمەندە، بە هەبوونی جێگەیەکی دیارلە یەدەکی نەوت لەسەرانسەری دونیادا، سەرەڕای هەبوونی گازی سروشتی و چەندین جۆری کانزا لەژێر زەویدا ،وکە بەشێکی زۆری ئەم سامانە هێشتا هەربەکارنەهێنراوە،جگە لەوەش خاوەنی زەوی کشتوکاڵی ودووڕوبار و هەڵکەوتەی لەسەر ڕێگەی ئاوی لە شەتولعەرەب و کەنداو،
کە فاکتەری گەورەیە بۆبازرگانی بەستنەوە بە دونیای دەرەوەوهەبونی سامانی گەشتوگوزاری ،بە گەشتوگوزاری دینیەوە بۆ هەبونی هێزی کارو کەشوهەوایەکی تاڕادەیەک گونجاو.
هەموو ئەوانە سامانی گەورەن بۆ ووڵات. ئەوەی کە پێویستە بۆ گۆڕینی ئەم سامانە بۆ ژیانێکی شایستەی گونجاو بۆ خەڵکەکەی، بوونی پلانی ئابوریی گونجاوە ،بەپشت بەستن بەزانستی نوێ.
کاری لەوشێوەیەش سیستەمێکی سیاسی گەل پەسەندو گرێدراوی گەلی دەوێت کە لە ڕێگەی هەڵبژاردنێکی ئازادو دیموکراسیانەوە دێتە دی. بەداخەوە ،ئەوەی عێراق بەڕێوە دەبات، سیستمێکی تایفەگەرای بێوێنەیە کە لەڕێگەی بەشبەشینەی تایفەگەری و نەتەوەیی ەوە هاتوە وهەموو جومگەکانی حوکمڕانی،
درێژکراوەی حوکمرانی ئیدارەی دەولەیە،کە لەلایەن ئەمریکاو هاوپەیمانانەوە بناغەکەی دانراوە، ولەژێرکاریگەری و وابەستەیی هەرێمایەتی ونێودەوڵەتیە و ئابورییەکەی ئابوری بەرخۆرە، کەبەپلەی یەکەم پشت ئەستورە بەداهاتی نەوت. ئەو جۆرە لە سیستمی سیاسی و ئابوری چاوەڕێی ژیانێکی ئازادوشایستەی لێناکرێت بۆگەل.