ژن، ژیان، ئازادی..
ڕێبوار سیوەیلی
1. یەكێك لە جوانترین تایبەتمەندییەكانی ئەم شۆڕشەی لە ڕۆژهەڵاتی كوردستانەوە هەڵایسا و وا ئێستا سەراپای ئێرانی گرتەوە، ئەوەیە كە هەم قوربانییەكەی و هەمیش زۆربەی بەشدارییكەرانی ژنانن.
پەیوەندییەكی نزیك هەیە لە نێوان ناوی (ژینا) و (ژیان) و (ژان) و (ژینوار) و (ئازادی)دا. وەكئەوەی ئەم شۆڕشە بیەوێت لە ڕۆحی مێینەیی چەپێنراوی هەزاران ساڵەوە هاواری خۆی بەرز كاتەوە. بە ڕێكەوت نییە ژیناكان داوای ژیانێكی مرۆییانە دەكەن و دەیانەوێت ژینواری خۆیان لە داعشباوەڕی كۆماری ڕەگبار خاوێن بكەنەوە.
ژنبوون لەم ناوچەیەدا هەمیشە ژانێكی گەورە بووە، كە هەرگیز ڕێگەی نەدراوە ئەو ژیانە بهێنێتە بەرهەم كە مرۆڤ شایستەیەتی. وەكئەوەی ئەم شۆڕشە بیەوێت ئەم هەڵە مێژووییە ڕاستبكاتەوە و مرۆڤایەتی لە ژێر دەستی ستەمكاری نێرسالاری و ئایینسالاری و توندوتیژی پیرۆزكراو ڕزگار بكات، تاكو بگاتە ئازادییەك بۆ هەمووان.
2. جوانییەكی دیكەی ئەم شۆڕشە لەوەدایە كە خەریكە سنوور و كەوشەنە ئایدیۆلۆژییە نەتەوەییەكان تێپەڕ دەكات و شوناسە قەومی و لۆكاڵییەكە لە بەرامبەر شوناسی مرۆڤانەدا شوێنی پێ لەق دەكرێت.
ژنان لەمەشدا شوێن ئایدیۆلۆژیای نێرسالاری نەكەوتوون و بە بەهانەی كوردبوون و فارسبوون و بەلووچ بوون و چی و چییبوونەوە بێ موبالاتی و یەكتر پشتگوێ خستنیان هەڵنەبژارد. ئەوانە بەبێ ڕەچاوكردنی ئەو سنوورانەی قەومییەتەكەیان لە ئاست شوناسی قەومییەتەكانی دیكەدا زەقیان دەكاتەوە، شوناسی دایكبوون و ژنبوونیان كردە شوناسی هاوبەش..
ژنانی ئیلام و كرماشان و سنە و مەریوان و ئازەربایجان و ورمێ و تاران و تەوروێز، بە هەمان ئەندازە بۆ ژینای كوردستانی گریان، كە سەقزییەكان و دایكی ژینا لەسەر گۆڕی كچەكەی شینی دەگێڕا.
3. لە نێوان ئەم شۆڕشە و شۆڕشی مەزنی ڕیفراندۆمدا، كە لەم ڕۆژانەدا یادی دەكرێتەوە و هەر كوردی ڕۆژهەڵات پشتیوانیكەرێكی هەرە سەرسەختی بوون، خاڵی لێكچوون هەیە. وەكئەوەی ئەم شۆڕشەی ئێستا ڕۆحە چەپێنراوەكەی ڕیفراندۆم بێت و بەم شێوەیەی ئێستا بێتە دەنگ.
ڕیفراندۆمیش هەر زوو بووە خواستی گەلان و كەمینە ئایینی و نەتەوەییەكان و هەر زووش سنوورەكانی هەرێمی كوردستانی تێپەڕاند و كوردی گشت بەشەكانی دیكە و تاراوگەنشینانیش لە ئامێزیان گرت. ڕیفراندۆمیش تێپەڕین بوو لە كوردبوونی ڕووتەوە بۆ كوردستانییبوون و لەوێشەوە بۆ نیشتمانیبوون و لەوێشەوە بۆ مرۆڤبوون.
4. ئەمە تایبەتمەندی شۆڕشە ڕاستەقینەكانە، كە وزەی ئەوە بە مرۆڤ دەبەخشن؛ لەیەك كاتدا شوناسێكی تایبەت و چەندین شوناسی هاوبەشیان هەبێت.
شۆڕشی ڕاستەقینە ئەو شۆڕشەیە كە لە دڵی هەر تاكەكەسێكدا بریسكەی ڕاچەنین هەڵدەگیرسێنێت بەبێ ئەوەی شوناسی تاكەكەسی و نەتەوەیی و سنووری لۆكاڵی بتوانێت ڕێگری لەو تاكەكەس بكات، نەبێتە مرۆڤێكی گەردوونی.
5. بەدەر لە ڕەهەندە تراژیدییەكانی هەر شۆڕشێك، خۆشحاڵم بەوەی كورد لە هەر شوێنێك خەبات بكات، خەباتەكەی دەمانباتەوە سەر بنەوانە ڕەسەنەكانی بەرگریی و مرۆڤبوون. دەمانباتەوە سەر ئەسڵێكی ڕەسەن، كە ڕەگوڕیشەی لە شارستانییەتی ئێمەی كورد، لە جوگرافیا و قووڵاییەكی مێژوویی ناوچەكەدایە.
ئاخر هەر لەم ناوچەیەدا بناخەی پێكەوەژیان و ژنسالاری و ئەویتر دۆستی داڕێژراوە و ئەمەش وایكردووە كە ئەم ناوچەیە ئەوەندە بە توانای مرۆیی دەوڵەمەند بێت. بڕوانە موزیك و فۆلكلۆر و بەیتەكانی ئێمە چ پانتاییەكیان بۆ ئازادیی تێدایە و چۆن ڕەسەنێتی و خۆدەربڕین لە شێوەی هونەر و داهێناندا خۆی بەرجەستە دەكات. شۆڕشگەلێ لەم ناوچەیەدا سەر هەڵدەدەن، هیچ چارەیەكیان نییە لەوە زیاتر ،كە شۆڕشی دایكانە بن و لە پێناو ژیاندا و ئامانجیان ئازادی بێت. هەر بۆیەشە دروشمی ئەم شۆڕشە: (ژن، ژیان، ئازادی) بەیادخەرەوەی قووڵاییە مێژووییەكەی شارستانییەتی ئەم ناوچەیەیە.
سەركەوتن بۆ ژن و ژیان و ئازادی..
21/9/2022