نامەی شاژنێکی کورد بۆ شاژنە ئەلیزابێتی دووەم
سڵاو لەخانمی شاژن …….
من خانمێکی کوردم خەڵکی شاری کەرکوکم ماوەی پێنج ساڵە لەدۆخێکی خرابدا گوزەر ئەکەم لە لەندەن ، منیش وەک بەڕێزتان شاژنی ماڵی خۆم بووم و خاوەن کۆشکی خۆم بووم و دایکم ،
کاروپیشەو مووچەم هەبوو وەک تۆ ، مامۆستا بووم ماوەی ۲٤ ساڵ نەوەم پێگەیاندوە. لەڕاستیدا هەناسە سوار ببوو لەنیشتیمان، ئێوە کێشەی تێکئاڵاوتان سازکرد بۆ وڵاتەکەم بۆیە ئێمەش هەڵهاتین و نیشتیمانمان جێهێشت.
بەڵام ئێستا بەڕێزتان لەکۆشکی خۆتان و منیش بێ لانەم کە ژیانێکی سەخت و ئاڵۆز بەڕێ دەکەم.
کەسێک نیە هانای بۆ بەرم هاوکارم بێ لەم میحنەتەم ناچار بووم لەدەرگای تۆ بدەم کە خاوەن گەورەترین هێز و دەسەڵاتیت لەم وڵاتە.
ئێوە وڵاتی مەگنەکارتەرن خاوەن کۆنترین سیستەمی دیموکراتین بەپێی ئەو یاسایە بڕواتان بە مافی مرۆڤ بوون و پەنابەریتان بە سەربەرزییەوە هەیە بەڵام ماوەی پێنج ساڵە بێ وەڵام وێڵم لەم کووچە بۆ ئەو کووچەی غوربەت.
پاشی پێنج مانگ وەڵامی خانمی شاژنە ئەلیزابێت بۆ شاژنە کوردەکە :
سوپاس بۆ ناردنی نامەکەت و دڵتەنگم بە بیستنی هەواڵت کە لەکێشەدان، بەڵێ من شاژنی وڵاتم بەڵام بەداخەوە چارەی دەردت لای من نیە پەیوەندی بکەن بە شوێنی مەبەستەوە (هۆم
ئۆفیس).
لێرەدا بۆمان ڕوون دەبێتەوە کە خانمی شاژن دەسەڵاتەکانی سنوردار و کارتۆنین گەر بەمێژوودا بچینەوە دەزانین بڕیارەکانی بەریتانیا لەناو پەرلەمان دەدران و پاشان بۆ واژووی کۆتایی دەهاتنە لای شاژن و دەبوو واژۆی بکات گەر ڕازامەند بوایە یاخود نا!
بەڵام لەتەک هەموو ئەم دەسەڵاتە بەهێز و کارتۆنیەوەی مووچەی هیچ هاوڵاتیەکی دوا نەکەوتوە و نیوە و چارەک نەکراوە، تێچوی نەخۆشی بەتەمەن و مناڵانی خوار ۱۸ ساڵ بێ بەرامبەرە بە گشت ئیمێرجنسیەکانەوە.
هەڵگرانی پاسپۆرتی بەریتانی ئەزانن کەچەند بەخت یاوەریانە.
جوانی نامەکە لەوەدا دەبینم کە ئەم خاتوونە هێند بە بڕوابەخۆبوونەوە نامەی ناردوە کە هاوتای شاژن خۆی خەمڵاندوە هەر بۆیە شاژنیش بەڕێزەوە وەڵامی داوەتەوە ، ئەوە باش بزانن دایکی من و ئێوەش لەپێگەی خۆیدا شاژنە بە دڵنیاییەوە سەنگ و قورسی خۆت ، خۆت ئەینرخێنیت نەک کەسی بەرامبەر، ئەوەشتان بیربێ شاژنیش وەک ئێمە ژن بووە و مرۆڤ بووە و دایک بووە.
تێبینی/ نێرەری نامەکە خاتوو گێلاس زەنگەنەیە کچی حاکم موعتەسەم کە لەکەرکوک ماوەی ۳۳ ساڵ سەرۆکی دادگای گەورە بوو.
کاتی نامەکە ساڵی ۲٠٠۷ ، ئێستا خاتوو گێلاس هەڵگری پاسپۆرتی بەریتانیە.
سوپاس کە کۆمەڵگای کوردی خاوەن زۆر لە شاژنە بوێرەکانن .
ئەمەل سەعید کوردە
